Um Kristján
Kristján Eldjárn (1972-2002) stundaði gítarnám frá unga aldri í Tónmenntaskóla Reykjavíkur og Tónlistarskólanum í Reykjavík hjá Eyþóri Þorlákssyni og Páli Eyjólfssyni en var síðan nemandi Einars Kristjáns Einarssonar í Tónskóla Sigursveins og lauk burtfararprófi þaðan í klassískum gítarleik vorið 1996. Jafnframt nam hann rafgítarleik við djassdeild Tónlistarskóla FÍH sem nemandi Eðvarðs Lárussonar, Hilmars Jenssonar og Sigurðar Flosasonar og lauk burtfararprófi þaðan vorið 1995.
Á árunum 1997-1998 stundaði hann framhaldsnám í klassískum gítarleik við Tónlistarháskólann í Turku í Finnlandi og lauk einleikara- og kennaraprófi þar hjá hinum þekkta gítarmeistara Timo Korhonen.
Kristján lék jöfnum höndum á klassískan gítar og rafgítar og batt sig aldrei við eina tegund tónlistar. Hann kom fram með fjölda hljómsveita og hópa hér heima og erlendis. Hann lék inn á fjölmargar hljómplötur, sá um útsetningar og stjórnaði upptökum. Hann samdi og/eða lék tónlist við ótal leikverk, danssýningar, kvikmyndir, sjónvarpsþætti og auglýsingar. Hélt 1996-2000 á annan tug einleikstónleika víða um land og rúmlega 130 skólatónleika, m.a. á vegum verkefnisins „Tónlist fyrir alla".
Fyrstu einleikstónleika sína að loknu námi hélt Kristján í Listasafni Sigurjóns Ólafssonar 7. júlí 1998. Í dómi um tónleikana í Morgunblaðinu 9. júlí segir Jón Ásgeirsson tónskáld þá hafa verið „...eldskírn, er setur Kristján þegar í hóp okkar bestu gítarleikara."
Um minningarsjóðinn
Minningarsjóður Kristjáns Eldjárns gítarleikara var stofnaður af ættingjum Kristjáns, vinum hans og samstarfsmönnum eftir að hann lést 22. apríl 2002 tæplega þrítugur að aldri.
Minningarsjóðurinn verðlaunar árlega efnilega tónlistarmenn og afreksfólk í tónlist með drjúgu fjárframlagi, enda er það ásetningur sjóðsstjórnar að upphæðin skipti tónlistarfólkið verulegu máli og veiti því aukið svigrúm til að helga sig spennandi verkefnum á sviði tónlistar.
Árin 2003 og 2012 voru haldnir tónleikarnir „Í minningu Eldjárns", þar sem fjöldi manns lagði sitt af mörkum, en allur ágóði rann óskiptur í sjóðinn. Fjáröflun hefur síðan fyrst og fremst byggst á frjálsum framlögum og sölu minningarkorta, auk þess sem sjóðurinn hefur gefið út hljómdiska og bók til sölu. Diskurinn Ljóð, hljóð og óhljóð með tónlist Kristjáns við ljóðalestur Þórarins Eldjárns, kom út 2003 en 2006 stóð sjóðurinn að endurútgáfu á þýðingu Kristjáns Eldjárns forseta á Max og Mórits eftir Wilhelm Busch. Diskurinn Gítarmaður kom út 2012 með upptökum af tvennum burtfarartónleikum Kristjáns. Diskarnir eru nú aðgengilegir á Spotify og öðrum tónlistarveitum.
16. júní 2007, þegar Kristján hefði orðið 35 ára, var í fyrsta skipti úthlutað úr sjóðnum og hlaut þá verðlaun Kristinn H. Árnason gítarleikari. Síðan hafa eftirtaldir tónlistarmenn bæst við:
